Namminersortutut suliassaqarfinni inuussutissarsiuteqarnerup aaqqissussaanera
Inuussutissarsiummik Ingerlataqartunik Nalunaarsuiffik (IIN) tassaavoq namminersorluni inuussutissarsiuteqarnerup aaqqissuussaanerata nassuiarneqartarnissaanut paasissutissatigut tunngaviusoq.
Nunami inuussutissarsiutit
Inuussutissarsiutit nunamiittut amerlanersaat aalisarnerup, piniarnerup, aatsitassarsiornerup takornariaqartitsinerullu malitsigisaattut inissisimapput, kaaviiaartitaallu ineriartornerallu taakkunanngattaaq pissuteqartumik aallaaveqarluni. Suliffeqarfiit siunissaq isigalugu ineriartornissaat soqutiginarpoq aammalu nalinginnaasumik aningaasatigut ikiorsiissutaasartut soorlu aalisarnermut takornariaqarnermullu nalinginnaasumik minnerusarlutik.
Niuerneq
Atortussanik pisiniarfiit ulluinnarni pisiniarfinnit saqquminerpaapput. Atortussanilli pisiniarfinni suliassaqarfiit immikkut nioqqutissaatillit pingaartumik illoqarfinni anginerusuniipput.
Atortussanik pisiniarfiit anginerit pingasut tassaapput peqatigiiffik atuisartunit pigineqartoq Kalaallit Nunaanni Brugsenit, pisiniarfiutileqatigiinnit namminersortunit pigineqartoq Pisiffik A/S aamma Namminersorlutik Oqartussanit pigineqartup KNI A/S-p immikkoortortaqarfia Pilersuisoq A/S (KNI A/S).
Kalaallit Nunaanni niuertarfinnit niuernerup ilisarnaatigaa nioqqutissat ulluinnarni atortakkat tamangajammik Danmarkimit pisiarineqartarnerat. Taamaattumik Danmarkimi nioqqutissat amerlanaarlugit niuernermi akit allanngorarnerat Kalaallit Nunaanni aamma akit allanngorarnerannut pingaaruteqarpoq.
Sanaartornermik sanaartukkanillu suliassaqarfiit
Sanaartornerup ilisarnaatigaa pisortat imaluunniit pisortat ingerlatseqatigiiffiutaat suliassanik amerlanernik isumaginnittuusarnerat.
Aserfallatsaaliineq iluarsaassinerlu
Illut atortullu pioreersut amerliartuinnartut ima pisoqaassuseqalerput aserfallatsaaliinissaq nutarterinissarlu pisariaqariartuinnarluni. Inissianik, ilinniarfinnik, teknikikkut atortunik aammalu pilersuinikkut attaveqaatitigullu atortunik iluarsaaneq sanaartornikkut sulianut pingaaruteqaleriartuinnarput.
Neqerooruteqarneq, suliariumannittussarsiuussineq, sanaartornermi malittarisassat maleruaqqusat allallu
Kalaallit Nunaanni sanaartornerit suliariumannittussarsiuussisarneq pillugu inatsisikkut 1992-meersukkut malittarisassaqartinneqarput, aamma suliassanik neqerooruteqartarneq suliaqartarnerlu pillugit nalunaarummit 1994-meersumit, isumaqatigiissummi inatsisitigut/aningaasatigut tunngavigineqartut Sanaartortoqarnerani Suliaqarnermi Tunniussinermilu Ataatsimut Piumasaqaatit – AP95 – 1995-meersoq, Kalaallit Nunaanni sanaartornermi malittarisassat 1982-meersut 1987-meersumik nr. 1-imik ilassuteqaateqartut aammalu teknikikkut malinneqartartut malittarisassanik ilassuteqartinneqarput.
Sanaartornermik sanaartukkanillu suliffeqarfiit
Sanaartornermik saanartukkanillu ingerlatsiviit nunap pissusaanut naleqqussagaapput siammasissumillu najugaqarfinnut naleqqussagaallutik. Suliffeqarfiit amerlanerit illoqarfigisaminni nunaqarfinnilu qanigisaminni suliassanik isumaginnittarput, suliffeqarfiillu ikinnerusut nuna tamakkerlugu suliassanik isumaginnittarlutik. Sanaartornermi sanaartukkanillu suliffeqarfiit amerlanersaat Nuummi inissisimapput. Naatsorsueqqissaartarfiup nalunaarusiaq una 2005-mi qallunaatut saqqummersippaa: ”Kalaallit Nunaanni sanaartorneq 1998-2003: Ukiup qanoq ilinerani allanngorarnerit, nuttarnerit suliffissaaleqinerlu”.
Sullissineq
Suliffeqarfiit sullissinermik suliaqartut assigiinngitsorpassuarnik suliaqarput. Assersuutitut taaneqarsinnaasut tassaapput biilinik iluarsaassineq, TV-inik, errorsivikkunnik qerititsivinnillu iluarsaassineq, assartuineq, paaviaaneq aammalu eqqiaaneq.
Sullissinermik suliaqartunit ataasiakkaat suliffeqarfiupput annertuut, sullissiviilli mikinerit amerlanerupput taakkulu inissisimaffimminni suliassanik ingerlatisuupput. Suliffeqarfiit amerlanersaat sulisorisanik ilinniarsimasunik pisariaqartitsinngiffiusuni suliassanik isumaginnittarput, assersuutigalugu eqqagassalerinerni, eqqiaasarnerni taxanillu angallassisarnerni. Taakkunaniipput suliffeqarfinnik piginnittut Kalaallit Nunaanni inunngorsimasut amerlanerpaat.
Siunnersuisarneq
Aningaasatigut siunnersuinerit ingammik pisarput kukkunersiuisuni, aningaaserivinni, aamma naatsorsuuserivinni.
Sanaartornermi teknikeqarnikkut siunnersuisarneq pingaartumik illussanik titartaasarfinnit ingeniøritullu siunnersuisarfinnit sanaartornerup iluani isumagineqartarpoq.
Qarasaasianut tunngatillugu siunnersuisarneq siunnersortinit suliffeqarfinnillu programminik atortunillu tuniniaasartunit isumagineqartarpoq, paasissutissanik suliarinnittarnermik suliffeqarfinnit kiisalu paasissutissanik katersuisartunit ingerlateqqiisartunillu isumagineqartarpoq. Taamatuttaaq suliffeqarfeqarpoq pingaartumik aqutsinermik siunnersuisartunik. Suliffeqarfiit siunnersuisartut amerlanersaat Nuummiipput, suliffeqarfiillu mikinerusut naatsorsuinermik isumaginnittartut, sinerissami tamarmi najugaqarfinniillutik. Siunnersuisartut suliarisartagaasa ilinniarluarsimasunik pisariaqartitsiviusarnertik ilisarnaatigaat. Tamanna pissutigalugu sulisut Kalaallit Nunaata avataani sulisussarsiarineqartartut amerlaqaat.
Nittartakkat takuneqarsinnaasut:
Inatsiseqartitsinerit ingerlataqarfiillu tamarmik nalunaarsorsimaffiat nittartakkami uani takuneqarsinnaapput: www.nanoq.gl
Niuerfiit nittartakkani ukunani takukkit: www.brugsen.gl, www.pisiffik.gl aamma www.kni.gl